URAMBO YATOA MILIONI 115.6 KWA VIKUNDI 8 VYA MIKOPO, MAMILIONI YANASUBIRI WENGINE.

Siku iliyowekwa: January 15th, 2025

Ikumbukwe Serikali ilisitisha utoaji wa Mikopo kwa ajili ya Wanawake, Vijana na watu wenye Ulemavu ili kuweka miongozo na kanuni madhubuti juu ya utoaji na urejeshaji wa mikopo hiyo.

Hata hivyo, Mnamo mwezi Julai, 2024 Serikali ilielekeza Muendelezo wa Utoaji wa Mikopo hiyo chini ya kanuni na Mwongozo wa utoaji Mikopo wa mwaka 2024.

Aidha baada ya usitishwaji wa utoaji wa mikopo Halmashauri ya Wilaya ya Urambo iliendelea kutenga fedha kwa ajili ya Makundi hayo kulingana na Mwongozo ambapo hadi kufunguliwa dirisha la Maombi Halmashauri ilikuwa imetenge zaidi ya Milioni 600.

Tarehe 14.01.2025 Mkuu wa Wilaya ya Urambo Mhe. Dkt. Khamis A. Mkanachi amekabidhi Mikopo yenye thamani ya Tsh. Milioni 115.6 kwa Vikundi mbalimbali Wilayani hapa (Milioni 85 kwa wanawake na 30,600,000/= kwa Vijana) ambavyo vinatoka katika kata za Urambo, Imalamakoye, Ussoke na Kapilula.

Katika Hafla hiyo Mkurugenzi Mtendaji wa Halmashauri ya Wilaya ya Urambo Bi. Grace Quintine amevisistiza Vikundi hivyo kuzingatia biashara na marejesho ya wakati kwani lengo la Serikali ni kumuinua Kila mwananchi kiuchumi hivyo Mikopo hii isiyo na Riba inapaswa kutumika vyema na kurejeshwa kwa wakati ili kunufaisha Jamii ya Urambo.

Aidha Mgeni Rasmi Mhe. Dkt. Mkanachi amevieleza vikundi hivyo vikafanye biashara kulingana na walivyoomba ili pale watakapomaliza kurejesha waweze kuomba tena. Aidha Dkt. Mkanachi ameelekeza kuwa Vikundi vilivyokosa Sifa kwa awamu ya Kwanza viweze kuitwa ili kurekebisha makosa na kuelekezwa ili kutorudia makosa kama yaliyoonekana katika maombi yao ya awali ili waweze kuomba na kupata mikopo kwa awamu zijazo.

Aidha Mwenyekiti wa Halmashauri ya Urambo Mhe. Adam Malunkwi amemshukuru Mhe. Dkt. Samia Suluhu Hassan kwa kuridhia kuendelea na mikopo hii huku akisisitiza vikundi vilivyopata mikopo kuwa wa mfano kwa vikundi vingine.

Nao wajasiriamali wamemshukuru Mhe. Dkt. Samia Suluhu Hassan kwa kuwashika wajasiriamali mkono na kusema wamefarijika sana na wameahidi kutumia mikopo kama ilivyokusudiwa na kulipa kwa wakati ama ikiwezekana kabla ya wakati kwani wasipolipa kwa wakati wanazuia wanaotaka kupata wasiipate.

Kazi iendelee