UTUNZAJI WA MIUNDOMBINU YA SERIKALI WASISITIZWA URAMBO

Siku iliyowekwa: June 17th, 2025

Urambo - Tabora.

Kamati ya Siasa Mkoa wa Tabora kupitia mwenyekiti wake Ndugu. Said Juma Nkumba,  imesisitiza juu ya uelimishwaji wa wananchi juu ya umuhimu wa kutunza miundombinu ya miradi mbalimbali iliyotekelezwa kwa kiwango cha juu katika Wilaya ya Urambo.

Hayo yamesisitizwa wakati wa  ziara ya Kamati ya Siasa Mkoa wa Tabora iliyofanyika tarehe 16.06.2025, ambapo kamati hiyo imetembelea mradi wa maji katika Kata ya Usisya  kijiji cha Sipungu, Mradi wa Shule Mpya ya Sekondari Kata ya Muungano (Tsh. Milioni 603) pamoja na Ujenzi wa Shule mpya ya Msingi katika Kata ya Kiyungi (Tsh. Milioni 364.5)

Aidha pamoja na maelejezo ya utunzaji wa miradi, Ndugu. Nkumba amepongeza ufanisi wa utekelezaji wa miradi hiyo na kusema kuwa Serikali ya awamu ya Sita imefanya kazi kubwa kwani fedha zilizoletwa zimefanya mambo mengi na makubwa kwa ajili ya kutoa huduma bora kwa watanzania.

Sambamba na hilo Ndugu. Nkumba ameelekeza kuwa miradi na taasisi za Umma ziweze kupata huduma muhimu ya umeme mapema ili kuweza kufanya kazi kama ilivyokusudiwa.

Aidha Mbunge wa Jimbo la Urambo Mhe. Margaret Sitta amesema kuwa mafanikio yanayoonekana ni kutokana na ushirikiano anaoupata katika ngazi mbalimbali ikiwemo Ofisi ya Mkuu wa Wilaya ya Urambo pamoja na Ofisi ya Mkurugenzi Mtendaji wa Halmashauri ya Wilaya ya Urambo. Nao Waheshimiwa Madiwani wa Kata za Usisya, Muungano na Kiyungi wameshukuru Serikali kwa uletwaji wa miradi hiyo itakayosaidia jamii zao.