Watendaji Natarajia Mageuzi, Mabadiliko Katika Lishe: DC Urambo

Siku iliyowekwa: July 27th, 2023

Mhe. Kenani Kihongosi Mkuu wa Wilaya ya Urambo ameagiza Watendaji wa Kata 9 zilizoshindwa kufikia lengo la asilimia 100 katika afua ya kila mwanafunzi kupata anglau mlo mmoja wa chakula wakiwa shuleni kuendelea kuelimisha kuhamasisha wazazi na walezi kuchangia chakula ili watoto waweze kupata chakula wakati wa masomo na anatarajia kuona mabadiliko ya asilimia zikiongezeka wakati wa tathimini ya kikao cha robo ya kwanza kwa mwaka 2023/24.

Mhe. Kihongosi ametoa agizo hilo leo hii 27 Julai, 2023 kupitia kikao kazi cha Tathimini ya Mkataba wa Lishe robo ya nne kilichofanyika kwenye ukumbi mdogo wa mikutano wa Halmashauri na kuwasihi kila Mtendaji wa Kata kutimiza wajibu wake kwa kutumia ushawishi, maarifa na utashi  aliyojaliwa na Mwenyezi Mungu kuhakikisha anaeleweka kwenye jamii kwenye uchangiaji wa chakula cha wanafunzi na siyo kutumia mabavu na nguvu kama ilivyozoeleka.

Mhe. Kihongosi amewapongeza viongozi, na wananchi wa  kata 9 zinazofanya vizuri kwenye kutoa chakula kwa wanafunzi shuleni, ambazo ni  kata ya  Itundu, Kapilula, Kasisi, Nsenda, Ukondamoyo, Urambo, Uyogo, Uyumbu na Vumilia na kuhimiza uongozi na jamii nzima ya  kata 9 zilizoshindwa kufikia lengo kutambua faida na muhimu wa kufanya hivyo ikiwa ni pamoja na kupunguza utoro na  kuongeza ufaulu kwenye mitihani ya ndani na Taifa kwa ujumla. "Watendaji wetu wa Kata mliopo hapa, Wazazi/walezi waelezwe na wajue ni wajibu wao kumlea na kumdumia mtoto na kesho mtoto huyo akifanya vizuri masomoni na maisha yakaenda sawasawa  atakuwa na nafasi nzuri na kubwa zaidi  ya kuwahudumia wazazi/walezi wake" amesema Mhe. Kihongosi.

Awali akisoma taarifa ya Tathimini ya Mkataba wa Lishe Robo ya Nne kwa mwaka ulioishia 30 Juni, 2023, Bi Chonge Mazengo Afisa Lishe Wilaya amezitaja kata 9 zilizopata alama chini ya   asilimia 76 katika afua ya kila mwanafunzi kupata anglau mlo mmoja wa chakula wakiwa shuleni ni Imalamakoye, Kiloleni, Kiyungi, Mchikichini, Muungano, Songambele, Ugalla, Usisya na Ussoke.